Mark 14
Ri Im Sal isi Siimete Iesu
(Mt 26:1�5; Lk 22:1�2; Jn 11:45�53)
1Iwu e biing famu na tel inen na Liuliu Kulef ken fan Iudaia, ke tel inen na beret ae biil ti is lo, foron laulaumet na pris ke foron tom fafausum ini nagogon, ri ka im sal isi rin fabal pes Iesu, ke rik luse u ma rik siimete u. 2Ri ka tarah, “Gong kere tel u na foron biingen tel inen, tarama fanu ri ka fapaket.”Nenge Fifin i To Sanda na Olo Iesu
(Mt 26:6�13; Jn 12:1�8)
3Iesu tinaiwa biitom na Beteni na fel ke Saimon, ae pakanini i sem ta lepra. Aunbiing i ienien la, nenge fifin ka la usuf i ini nenge sanda furung ae ri foteng u ini nat. I fen kanaka e mata, ma tinawii na nenge fabiro luunluun dan ae ri tel u ini fat. Ka bayi ufu mata, ke ka to u na olo Iesu.4Fale fanu ae ri kiis ta aiwa, ri ka ngaliaf ma ri ka tara fis tom sing ri aragii, “Isi sanih ka falange sanda igii? 5Isi sanih biil i kep u isi fanu rik fiil u ini ituul e mar ma tiga e dinari, ▼ isi ik fen foron lauu ini?” Pesu ri ka belbel orek u lo.
6Iesu ka fas ri aragii, “Sok ufu fifin igii. Sanih gam fatamais u isi? I tel sinang rokap ulo iau. 7Foron lauu rin kiis la tom tura gam, ke ifasih gamen lupes ri na foron aunbiing gam ier isi. Isau le iau, biil ian kiis fitliu tura gam. 8Sanih ae ifasih le in tel u, ka tel fasuut ta u. Ka to ta sanda ulo iau, una fageges pununfong isi minet kiak. 9Tekentu kanaka ia fas gam, na foron maleh tikii na piklinbat, aunbiing rin fafas ini Rokap na Fafas, rin use sanih ae fifin igii i tel ta u, una namnamne tirik isi.”
Iudas i Somangat isi in Ta ufu Iesu
(Mt 26:14�6; Lk 22:3�6)
10Iudas Iskariot neng lon nenge sangful ini u e kalalik na fafausum, ka la usuf foron laulaumet na pris isi in ta ufu Iesu usuf ri. 11Aunbiing ri ongen u arae, ri ka lala laes, ke ri ka fas u le rin suat u tom. Ke Iudas ka tipes im isi ti aunbiing rokap ae in ta ufu Iesu usuf ri.Iesu turan Berberat na Fafausum kia ri Ien Inen na Liuliu Kulef
(Mt 26:17�25; Lk 22:7�14, 21�23; Jn 13:21�30)
12Na biing famu na foron biingen tel inen na beret ae biil i mel e is lo, aunbiing ae ri siimete natun sipsip la lo una tel inen na Liuliu Kulef, berberat na fafausum ri ka diik Iesu aragii, “O ier isi kemen la uwah isi kemek fageges inen una tel inen na Liuliu Kulef?”13Ke ka wuun ufu iwu e kalalik na fafausum kia ma ka fas ruh aragii, “Kamun kau ubae na Ierusalem, ma aunbiing kamun tapiek, kamun fatafe turan nenge kaltu i kusep nenge luunluun dan, ke kamun mi lo. 14Aunbiing in kau una ti fel, kamun diik taman fel ae aragii, ‘Tom Fafausum i diik le, fiawah e falifuh ae i turan berberat na fafausum kia rin ien inen na Liuliu Kulef lo?’ 15Ke in finngas kamuh ini nenge tara kakah salan foron ses, buuii na mawe na fel, ae ri ka fageges ta u. Kamun fageges inen arer aiwa.”
16Iun kalalik na fafausum ae ru ka tatkau ubae na Ierusalem, ke ru ka tafe foron tier tikii arae tom Iesu i fas ta ruh. Ke ru ka fageges inen una Liuliu Kulef aiwa.
17Na efef, Iesu turan nenge sangful ini u e kalalik na fafausum kia ri ka tapiek. 18Aunbiing ri ienien la, Iesu ka tarah, “Tekentu kanaka ia fas gam, neng lo gam tom in ta ufu iau, igii mang ka ienien la turang.”
19Ka purngis kanaka e balri, ke temtem tikii lo ri ka tara aragii, “Awii biil o use iau, beh?”
20Ke Iesu ka fas ri aragii, “Neng lo gam tom e sangful ini u e kalalik na fafausum, ae i falum beret una pelet na danun inen turang. 21Kalalik ken Kaltu in met arae ri siit ta u na Buk na Gogoh. Isau le in laulau kanaka usuf kaltu ae in ta ufu una liman foron tuui. In rokap kanaka male biil in pang tah.”
Inen ke Kumguui
(Mt 26:26�30; Lk 22:14�20; 1 Cor 11:23�25)
22Aunbiing ri ienien la biitom, Iesu ka kep beret ka fotrokap lo, ke ka sibik u, ma ka fen berberat na fafausum kia ini. Ke ka tarah, “Gam kep u, igii e pununfong.”23Namih ka kep nenge kap na wain, ka fotrokap lo, ke ka ta u usuf ri, ke ri tikii ri ka yin lo.
24Ke ka fas ri aragii, “Igii e daung ae i ring isi fanu fuun, ae i fasuut falimlim ke God isi fanu kia. 25Tekentu kanaka ia fas gam, biil sabin ian umin ti wain papang na aunbiing ian umin wain fuuh na matanfuntih ke God.”
26Ke aunbiing ri ka sek ta nenge seksek, ri ka la una pungpung na Olif.
Iesu i Use u le Pita in Fakawe ufu
(Mt 26:31�35; Lk 22:31�34; Jn 13:36�38)
27Iesu ka fas ri aragii, “Gam tikii gamen fin koseng iau, arae ri ka siit ta u na Buk na Gogoh le God i tarah,‘Ian siimete tom parpar kale sipsip,
ke foron sipsip rik fin sararah.’ ▼
28Isau le na aunbiing ian aptih fis, ian famu lo gam una Galili.”
29Pita ka tara sing i aragii, “Taftawa le ri tikii rin fin koseng o, iau biil tom.”
30Iesu ka kiliis u aragii, “Tekentu kanaka ia fas o, igii na wor aunbiing to biil biitom fawu i teng, ke fatuul ok fakawe ufu iau.”
31Isau le Pita ka rakrakai tom le, “Taftawa le ian met turam, biil tom ian fakawe ufu wo.” Ke berberat na fafausum tikii sabin, ri ka use u arae.
Iesu i Sising na Getsemani
(Mt 26:36�46; Lk 22:39�46)
32Iesu turan berberat na fafausum kia ri ka la una nenge porpor olif asa e Getsemani, ke ka fas ri aragii, “Gamen kiis sau aga ma iak sising.” 33Ke ka telpes Pita, Jems ke Jon. Ma aunbiing ae, ka tanwaran kalsakai tara mamais, ma ka purngis e bala. 34Ka fas rituul aragii, “Liu kiak i tatawin kanaka, ma fatat ian met. Gamtuulen kiis agawa ma gamtuulek tumarang.”35Ka mamlik la ituul sau, ke ka luutuf na nanal ma ka sising le, male ifasih, ke aunbiing una kalsakai fangungut ae, ik mangmangal koseng u. 36Ke ka sising aragii, “Aba ▼, Tata, o fasih on tel foron tier tikii, on tel ufu kap ▼ igii koseng iau. Isau le gong o mi na wolwol kiak, on mi tom lo arae na wolwol kiam.”
37Aunbiing i fis, ka par u le tuul kalalik na fafausum kia rituul masun. Ke ka diik Pita aragii, “Saimon, arafah, ok ka masun bin? Biil ifasih on mat bii pes ti fatuklin aunbiing? 38Gamtuulen tumarang ke gamtuulek sising, isi biil gamtuulen luut na fatoftof. Tanwa gamtuul i ier isi tel sanih i tortores, isau le fo gamtuul i mut.”
39Ke, ka la ma ka sising sabin arae sau i sising tah na famu. 40Aunbiing ka fis sabin, ka par u le rituul ka masun fis tah, wara le matrituul i tatawin kanaka. Biil rituul usum na sanih rituul en use u usuf i.
41Fatuul u e aunbiing ka fis sabin ke ka tarah, “Gamtuul famam borong biitom? Ka fasih mang. Aunbiing igii mang ka tapiek tah. Gamtuul par u, igii mang rik ta ufu Kalalik ken Kaltu una liman tom tel sinang laulau. 42Gamtuul aptih, ma kerek la. Apiek mang e kaltu ae in ta ufu iau una liman tuui.”
Ri luse Iesu
(Mt 26:47�56; Lk 22:47�53; Jn 18:3�12)
43Aunbiing Iesu i ororek la biitom, Iudas neng lon sangful ini u e kalalik na fafausum, ka tapiek turan nenge gur na fanu. Ri kep foron popok una fapaket turan foron kapsil. Foron laulaumet na pris turan foron tom fafausum ini nagogon ke foron famfamu, ri wuun ufu ta ri.44Ier ae in ta ufu Iesu ka fas famu ta fanu ae ini matngan fakileng ae in tel u ulo Iesu. I fas ri aragii, “Seh ae ian dor u, i sau e kaltu ae. Gamen luse u, ke gamek lame ufu, ma gamek parpar rokap kale u isi gong i fin.”
45Ke, Iudas ka la tortores usuf Iesu ke ka tarah, “Rabi!” Ke ka dor u. 46Ke ri ka pose lo Iesu ma ri ka dat pes u. 47Neng lon fanu ae ri sotih ta awii na fatat, ka dat ufu popok una fapaket kia, ke ka kasim ufu balbalun fafauun ken famfamu ken foron pris.
48Ke Iesu ka tara sing ri aragii, “Arafah, awii ngan iau e nenge tom siisiimete? Pesu gam ka la ini foron popok una fapaket ke foron kapsil isi gamen luse iau. 49Na foron biing tikii kere kiis turim la na Felun Sising, ia fausum fanu la ke biil gam luse iau. Isau le ka tapiek arae, una fasuut orek ae na Buk na Gogoh.” 50Ke berberat na fafausum tikii kia ri ka fin sararah koseng u.
51Nenge guam ae i mimih la lo Iesu, i luun nenge kaen sau. Aunbiing ri luse papte u, 52ka sok ufu kaen kia aiwa na limri, ke ka fin ini pongong.
Iesu i Sotih na Matan foron Famfamu ken fan Iudaia
(Mt 26:57�68; Lk 22:54�55, 63�71; Jn 18:13�14, 19�24)
53Ri ka lame Iesu usuf famfamu ken foron pris. Ke foron laulaumet na pris tikii, foron famfamu, ke foron tom fafausum ini nagogon, ri ka tapiek turim aiwa. 54Pita i mimimih la biitom lo Iesu, isau le i tapak tom, ke ka kau na falifuh ken famfamu ken foron pris, ke ka kiis turan foron tom parpar kale na falifuh ae, ma ka mingmingih na yiif.55Foron laulaumet na pris ke foron laulaumet tikii ken fan Iudaia, ri ka im isi ti tier laulau ae Iesu i tel ta u isi rin tiu u ini, ke rik siimete u isi. Isau le biil ri tafe ti tier. 56Ifuun ri ka lem ulo Iesu, isau le foron orek kiri biil i fafasih.
57Fal e fanu ri ka sotih ma ri ka lem ulo Iesu le, 58“Kemem ongen u i use u aragii, ‘Ian rabat Felun Sising igii ae fanu ri tel ta u, ke na intuul e biing, ian tel neng ae fanu biil ri tel ta u.’” 59Isau le foron orek kiri biil i fafasih.
60Famfamu ken foron pris ka sotih na famu lo ri, ke ka diik Iesu aragii, “Arafah, biil on kiliis foron orek igii ri tiu wo ini?” 61Isau le Iesu biil i kiliis ri ini ti orek.
Famfamu ken foron pris ka diik u sabin aragii, “Arafah, o Mesaia, Kalalik ke God ae i kalok fitliu?”
62Iesu ka kiliis u aragii, “Iau e i, namih gamen par Kalalik ken Kaltu in kiis na mia God ae i rakrakai kanaka, ma in tapiek na laukaf tinbae na kukulii.”
63Famfamu ken foron pris ka si dolon kaen kia tom, ma ka tarah, “Isi sah biitom kere ka ier isi ti orek una tiu u? 64Gam ka ongen ta u i puris God ini orek kia. Arafah gam wol arae?”
Ke ri tikii ri ka somangat ufu le in met tom. 65Fal lo ri, ri ka tipes ubis u. Ke ri ka fis kale mata ma ri ka tut u, ke ri ka tara sing i le, “O poropet, fas kemem, seh i tut o?” Foron tom parpar kale ri dat pes u ke ri ka paket u.
Pita i Fakawe ufu Iesu
(Mt 26:69�75; Lk 22:56�62; Jn 18:15�18, 25�27)
66Aunbiing Pita tinaiwa biitom na palgan ubiif kale fel ae, ke nenge tah fafauun ken famfamu ken foron pris ka tapiek. 67Aunbiing i par Pita i mingmingih la aiwa, ka lala kanap u ke ka tarah, “Wo sabin o la la tura Iesu tina Nasaret.”68Isau le Pita ka fakawe ufu aragii, “Biil ia usum lo, ke biil ia malal le sanih o use u.” Ke ka suuh una matan ubiif, ke to ka teng.
69Tah ae ka par u sabin, ke ka fas fanu ae ri sotih la aiwa le, “Igii e neng lo ri.” 70Pita ka fakawe sabin.
Biil i sawin ke fanu ae ri sotih fatat Pita, ri ka fas u aragii, “Tekentu tom le o sabin o neng lo ri, wara le wo tina Galili.”
71Ke ka falimlim na matri aragii, “God in ta fangungut sing iau male ian lem. Biil ia usum lo e kaltu ae gam use u.”
72Fanpil to ka teng sabin. Ke Pita ka sikpes tineng aunbiing i wol pes foron orek ae Iesu i use ta u sing i le, “Biil biitom fawu in teng e to, ke fatuul ok fakawe ufu iau.”
Copyright information for
TGG